Act 24 | BOJ | STEP | Bati 5-pela koboonaqa Juda naŋgo atra tamo gate Ananaias a ti Juda tamo kokba qudei ti Juda naŋgo anjam taqyo tamo bei aqa ñam Tertulus a ti Sisaria qureq aieb. Aisib Rom naŋgo tamo koba Feliks aqa ulatamuq dia tigelosibqa Pol aqa jejamuq di anjam qamoqneb.

Acts 24

Juda tamo kokba naŋgi bosib Feliks aqa ulatamuq dia Pol aqa jejamuq di anjam qamoqneb

1 Bati 5-pela koboonaqa Juda naŋgo atra tamo gate Ananaias a ti Juda tamo kokba qudei ti Juda naŋgo anjam taqyo tamo bei aqa ñam Tertulus a ti Sisaria qureq aieb. Aisib Rom naŋgo tamo koba Feliks aqa ulatamuq dia tigelosibqa Pol aqa jejamuq di anjam qamoqneb. 2 Onaqa Rom naŋgo tamo koba Feliks a na Pol metonaq warum miligiq bosiqa aqa ulatamuq dia tigelesonaqa Tertulus a tigelosiqa Pol aqa jejamuq di anjam qamqa osiqa Feliks minjej, “O Tamo Koba Feliks, ni na gago sawa endi geregere taqateqnum deqa bini iga bole unum. Iga qoto saiqoji. Ni na iga geregere aqaryaigoqnsimqa gago gulube kalil kobotetgeqnum. 3 Deqa iga ni qa tulaŋ areboleboleigwoqa ino ñam soqteqnum.

4 “O Tamo Koba Feliks, e anjam olekoba mermqasai. Ni asgimo uge. Deqa ni gago anjam truquyala endi que. 5 Iga tamo endi uneqnum, a tamo uge. A kumbra uge uge yoqnsi laqnsiqa Juda tamo uŋgasari sawa sawa kalilq di unub qaji naŋgo areqalo ugetetnjreqnaqa naŋgi ŋiriŋkobaoqnsibqa qoto tigelteqnub. A na tamo uŋgasari naŋgi joqoqnsiqa minjreqnu, ‘Niŋgi Nasaret tamo Yesus dauryiye.’ 6 A na gago atra tal aqa ñam dego ugetetgeqnu. Deqa iga a ojsim gago segi dal anjam na aqa une qa pegiyqa laqnamqa qaja tamo naŋgo gate koba Lisias a bosiqa gago anjam gentosiqa gago baŋq dena Pol siŋgila na yaigej. 8 Yaigsiqa mergej, ‘Niŋgi Pol qa anjam bei soqnimqa aisib Rom naŋgo tamo koba Feliks aqa ulatamuq di mariye.’ Deqa iga bosim ino ulatamuq endia Pol aqa une agi mermeqnum. Deqa Tamo Koba Feliks, ni segi na Pol nenemyimqa anjam kalil iga aqa jejamuq di qameqnum qaji di bole kio sai kio di a segi na mermimqa ni quqwam.” Tertulus a anjam degsiqa Feliks minjej.

9 Onaqa Juda tamo kokba kalil naŋgi tigelosib Tertulus aqa anjam di taqyosib mareb, “Aqa anjam di bole.”

Pol a kamba Feliks aqa ulatamuq dia tigelosiq anjam marej

10 Onaqa Feliks a Pol aqa anjam quqwajqa deqa aqa baŋ soqtosiq Pol metonaqa a kamba tigelosiqa marej, “O Tamo Koba Feliks, e qalie, ni wausau gargekoba sawa endi taqatesoqnem agi bini taqatejunum. Deqa e kamba ijo anjam mermqai. 11 Ya ya endi e Qotei louqajqa Jerusalem aiem. E aiem bati 12-pela gilqo. Juda tamo kokba naŋgi di qalie. Ni segi na nenemnjrimqa degsib mermqab. 12 E Jerusalem aisim di sosimqa e anjam na qotosaioqnem. Qoto tigeltosaioqnem dego. E qoto bei yeqnam Juda naŋgi na e nubosai. E atra talq dia, Juda naŋgo Qotei talq dia, qure ambleq dia dego lawo na soqnem. E kumbra uge bei yosaioqnem. 13 Deqa anjam kalil Juda naŋgi na ijo jejamuq di qameqnub qaji di bolesai. Naŋgi ijo une bole bei ubtsib marqa keresai.

14 “Ijo une qujai agiende. E Yesus aqa gam dauryeqnum. Juda tamo kokba naŋgi mareqnub, ‘Gam di bolesai. Gam dena tamo uŋgasari naŋgi ŋiriŋoqnsib poeleŋeqnub.’ Gam di qujai e dauryoqnsimqa gago moma naŋgo Qotei qa louoqnsimqa Moses aqa dal anjam ti Qotei aqa medabu o tamo naŋgo anjam nami neŋgreŋyeb qaji deqa ti ijo areqalo siŋgilatejunum. 15 Mondoŋ Qotei na tamo bole ti tamo uge ti naŋgi olo subq na tigeltnjrqas. Qotei qujai deqa e ijo areqalo siŋgilatoqnsim subq na tigelo bati qa tariŋoqnsim unum. Juda tamo kokba naŋgi dego Qotei qa naŋgo areqalo siŋgilatoqnsib subq na tigelo bati qa tariŋoqnsib unub. 16 E subq na tigelo bati qa tariŋeqnum deqa e bati gaigai ijo segi so geregere taqatoqnsimqa Qotei aqa ŋamdamuq dia, tamo uŋgasari kalil naŋgo ŋamdamuq dia kumbra bole bole yoqnsim laqnum.

17 “Ariya e sawa bei beiq dia wauosim laqnamqa wausau qudei koboonaqa agi Jerusalem aiem. Yesus aqa tamo uŋgasari sawa bei beiq di so qaji naŋgi na silali koroiyosib ebnabqa osi aisim Juda naŋgi mam soqneb deqa enjrem. Silali qudei osi aisim Qotei dego atraiyem. 18 E atra tal miligiq gilsimqa une kobotqajqa kumbra Moses a nami marej qaji di dauryosim yem. Di koboonaqa e Qotei atraiyeqnamqa Juda tamo kokba naŋgi bosib e nubeb. E tamo uŋgasari gargekoba joqsim sonam naŋgi e nubosai. E qoto bei dego tigelteqnam nubosai. 19 Ariya Juda tamo qudei Esia sawaq dena beleŋeb qaji naŋgi na e atra tal miligiq di sonam nubsibqa bosib e ojeb. Deqa naŋgi e qa anjam bei soqnimqa bosib ino ulatamuq endia tigelosib ijo une marqab. 20 Ariya naŋgi bosai. Deqa ni na Juda tamo kokba agi bosib endia tigelejunub qaji naŋgi nenemnjrimqa e Jerusalem dia naŋgo ulatamuq di tigelesonam une kie kio ijo jejamuq di uneb di ni mermqab. 21 Bole, ijo anjam qujai endeqa naŋgi na ijo jejamuq di une qametbeb. E naŋgo ulatamuq dia tigelesosim leleŋosim endegsi minjrem, ‘Tamo kalil moreŋo qaji naŋgi mondoŋ olo subq na tigelqab. Anjam deqa qujai niŋgi na e ojsib ijo jejamuq di une qametbonub.’ O Tamo Koba Feliks, e naŋgo ulatamuq di tigelosim anjam degsi minjrem.” Pol a na Feliks degsi minjej.

22 Feliks a tamo uŋgasari Yesus aqa gam daurysib laqneb qaji naŋgo kumbra qalie. Deqa a na Juda tamo kokba naŋgi endegsi minjrej, “Nuŋgo anjam di mati soqnem. Qaja tamo naŋgo gate koba Lisias a bamqa niŋgi olo anjam di maribqa e qusiy gereiyqai.” 23 Osiqa aqa qaja tamo gate bei minjej, “Ni na Pol osim tonto talq di waiysim taqatesoqne. A gulube bei yaim. Aqa was naŋgi a unqa bosib iŋgi iŋgi qa aqaryaiyqa maroqnibqa ni na saidnjraim.”

Feliks na Pol tonto tal di atnaqa a wausau aiyel di soqnej

24 Bati qudei koboonaqa Feliks naŋgi aqa ŋauqali Drusila wo olo beb. Drusila a Juda uŋa. Bosib Feliks a Pol metonaq aqa areq bej. Bosiqa tamo naŋgi Kristus Yesus qa naŋgo areqalo siŋgilatqajqa kumbra di Feliks minjnaq quej. 25 Kumbra bole bole dauryoqnqajqa deqa ti gago segi segi so geregere taqatoqnqajqa deqa ti Feliks minjnaq quej. Mondoŋ Qotei na tamo uŋgasari naŋgo une qa peginjrqajqa deqa ti Pol na Feliks minjnaq quej. Qusiqa ulaosiq Pol minjej, “Ni mati aisim ino warumq di soqne. Bunuqna e bati atsiy olo ni metmit bosim anjam di merbqam.” 26 Feliks a bati gargekoba Pol aqa anjam quqwajqa metoqnej. Aqa anjam quqwajqa deqa segi metosaioqnej. A endegsi are qaloqnej, “E Pol metitqa a bosim silali ebimqa e tonto talq dena a uratqajqa deqa kio merbqas?” Osiq deqa metoqnej.

27 Wausau aiyel koboonaqa Feliks a Judia sawa taqato wau di uratonaqa tamo bei aqa ñam Porsius Festus a kamba Feliks aqa wau di osiqa Judia sawa taqatesoqnej. Onaqa Feliks a na Juda tamo kokba naŋgo are boletetnjrqajqa deqa a Pol tonto talq di uratonaq soqnej.